Muqdisho,(insidesomalia.org)-Dawladda Faderaalka KMG ah ee Soomaaliya ayaa sheegtay in Ururka Al- Shabaab ay isku balaariyeen deegaanada Gobalka Shabeelada Hoose ay tahay mid keenaysa dagaalo ka qarxa Gobalkaasi, waxaa ay Dawladda diyaarineysaa Ciidamo ay udirto Gobalkaasi.

Shalay ayaa laga soo cayriyey Magaalada Marka Maamulkii ka ariminayey iyo Ciidamadooda, kuwaai oo usoo dhaqaaqey dhanka magaalada caasimada ah ee Muqdisho.

Taliska Ciidamada Qalabka sida ee Dawladda Soomaaliya ayaa sheegay in ay diyaariyeen Cutubyo ka tirsan Ciidamada Qalabka sida ee Dawladda, kuwasoo loogu talagalay dagaal ay la galaan ururka Al- Shabaab oo ka soo horjeeda wada hadaladii ugu dambeeyey ee Dawladdaiyo Maxkamadaha oo heshiis gaaray.

Warkan Dawladda ayaa sheegaya in ay lama huraan tahay in Kooxahaasi lala dagaalamo, ayagoo sheegay in ay yihiin rag ka soo horjeeda nabad ka dhalata dalka Soomaaliya ayna utageen Gobalka Shabeelada Hoose in ay barakiciyaan dadkii ka baxay Magaalada Muqdisho oo horey deegaanadaasi dhibaatooyin ugu heysteen waa sida ay hadalkooda udhigeene.

Dawladdu waxa ay sheegtay in aysan udulqaadan doonin gardarada iyo Daan daansiga qaawan ee ay sheegeen in ay ku hayaan Al- Shabaab Shacabka Soomaaliyeed iyo Ciidamada Dawladda, ayna isku diyaariyeen weeraro ay si toos ah ugu qaadayaan xarumaha lugu tuhmayo in ay joogaan.

Warkan dawladda kasoo yeerey ayaa ku soo beegmaya xili dhawaan degmooyinka Shabeelada Hoose qaarkood ay la wareegeen xoogaga Al-Shabaab.